Divar kağızlarının düzgün vurulması qaydası
Divar kağızları bugünkü günümüzdə çoxlu sayda üzləyici vasitələrin yaranmasına baxmayaraq, ən geniş yayılmış təmir-tamamlama vasitələrindən biridir. Divar kağızlarının yapışdırılmsı ilk baxışda təmirin çətin mərhələlərindən biri kimi görünür. Əslində isə burada çətin heç nə yoxdur. Yadda saxlamaq lazımdır ki, divar kağızları yalnız əvvəlcədən yaxşı hazırlanmış, təmiz, quru, hamar səthə yapışdırılmalıdır. Həmçinin təmir gedən otaqda havanın temperaturu 5 dərəcədən aşağı olmalı deyil və "skvoznyak"ların qarşısını almaq üçün bütün qapı və pəncərələrin bağlı olması vacibdir.
Divar kağızını yapışdırmaq üçün ilk növbədə divarda olan köhnə divar kağızları su ilə isladılıb çıxarılmalıdır. 3-4 qat köhnə divar kağızı qatı olan köhnə mənzillərdə divarların isladılması bir neçə dəfə həyata keçirilməlidir. Bundan sonra dəmir şpatellə köhnə oboylar qaşıyıb çıxarılır. Köhnə divar kağızları divardan qaşınıb çıxarıldıqdan sonra divarda olan çatlar doldurulmalıdır, alçı ilə yaxmalanmalıdır (şpatleyvka) və yalnız quruyandan sonra divar kağızının yapışdırılmasına başlamaq olar.
Divar kağızlarının yapışdırılmasının keyfiyyətli olması üçün yapışqan düzgün hazırlanmalıdır. Bunun üçün ilk növbədə yapışqan hazırlayacağımız qaba su doldurub yapışqanın qutusunun üzərində yazılmış proporsiyada yavaş-yavaş yapışqan tozunu əlavə edib mikserlə qarışdırırıq. Yapışqan tozunu yalnız yavaş-yavaş, ehmalla suya əlavə etmək lazımdır ki, sonradan yapışqanın içində düyünlər əmələ gəlməsin.
Divar kağızının kəsimi divar kağızının üzərindəki şəkil, o cümlədən tavan və döşəmənin aralıq məsafəsi nəzərə alınmaqla kəsilməlidir.
Divar kağızını yapışdırmadan öncə divar nəmi tez hopdurursa, onda divara yapışqan sürtmək olar, bu divar kağızı yapışdırılması zamanı şəkillərin uyğunlaşdırılması daha rahat olacaq. Kəsilmiş divar kağızlarına yapışqan sürtülür və divar kağızı ilə yapışdırıcının istifadə təlimatında yazıldığı müddət ərzində gözlənilir. Divar kağızının hər bir layına bərabər dərəcədə yapışqan vurulmalı və hər biri bərabər müddət saxlanılmalıdır. Divar kağızı divara yapışdırıldıqdan sonra plastik şpakel və rezin diyircəklə kağızın altında qalan havası çıxarılmalıdır, kənara çıxan yapışqan artıqları isə qupka ilə silinməlidir. Yalnız divar kağızı tam quruduqdan sonra otağın havasını dəyişmək olar.
